Jude

JUT

E Jëmis to teß voh non e kea soneß peß, a ëhnaneah e Jut, keß eß ivëh, to kiun voh o kiun vëh. Ivëhkëk, e teß Jëmis vëh, eß voh e susun pa napan va po vaman varih to teß voh ne Jerusalëm. A nap natnat peo to koman ne pan, e Jut voh vëh, eß e kea soneß pe Ieesuß, (Mak 6:3).

Manih po kiun vëh, ne Jut to hikta soe ka ra, o kum teß va po vaman poë harih neß to kiun ke na raoe. Eß to kiun voh o kiun vëh, pareß iu soe vavoh non manih pan, a kiu va pa kon hah a ra to taneß maß pe Sosoenën. Po poen neß to pënton a soe va po tövavaasis pikpiuk to meme vapiun e ne pa napan va po vaman pa ma vavaasis pee, ivëh, keß kiun o kiun vëh, marën a soe vaënpan raoe pa tah pamëh. Me eß to soe vakikis raoe pan, o vavaasis vëh pe Ieesuß se teß va non manih po këproß pee.

A ma kiun varih to tataki va ne manih pan,

A potan avih pe Jut, 1:1-2A soe va po tövavaasis pikpiuk, me a ma taateß pee, me a ma vavaasis pee, me o kamis teßteß tamoaan pee, 1:3-16Ee se nat ne vahuk këh o vaman pee, 1:17-23E Jut to kë a ëhnan e Sosoenën, me e Ieesuß Kristo, 1:24-25

A Soe Vaënpan Va po Tövavaasis Pikpiuk

1 Eöß e Jut, a teß kikiu akuk pe Ieesuß Kristo, me eöß e kea vatokpös pe Jëmis, to kiun nös manem peöm a napan ne Topoan to vaoe voh.

E Sosoenën Taman to iu a no neöm, köm teß vavih nem manih po matop pe Ieesuß Kristo.

2 Eöß to hinhin noß pan, e Sosoenën se ururuan a neöm, me eß se heß a neöm a taateß moomo, me a taateß iu teß se puh rakah ne manih peöm.

E Sosoenën Se Vakmis A Nap Hat

3 Ma vamomhë peöß, eöß to iu vörep rakah voh noß a kiun nös peöm, suk a kiu vëh ne Sosoenën to nok voh, marën a kon hah a ra kurus. Ivëhkëk, eöß to haraß noß a kiun ka neöm a meh tah ke. Eöß to iu noß a vakikis a neöm pa vapus vakis suk o vaman vëh ne Sosoenën to heß voh a napan peß pa paeh a tëëm ro. ^{▼▼[... suk o vaman vëh ne Sosoenën to heß voh a napan peß pa paeh a tëëm ro.] Eß to sosoe suk non a mët pe Ieesuß to teß va non manih po heß, neß to heß voh pa pah tëëm ro.} 4 A, eöm se matop vavih nem o vaman pea. Suk a ma pah teß varih to vakihat me ne sih e Sosoenën to hop aven voh ee maß po kum peöm. Moaan voh no o teß vanënën soe to kiun suk voh ee pa napan poë varih, pan ee se sun ee po vahutët apuh pe Sosoenën, ko teen ee pa hat. Ee to vavapus me ne a soe, pare këh voh ee po ururuan pe Sosoenën, ko teß e ne pa nok a ma taateß teßteßvaasiß. Pare koe me ee pa vaman e Ieesuß Kristo a paeh a Topoan, me eß e Sunön pea.

5 Eöß to iu vapënton hah a noß neöm pa ma pah tah nöm to nat moaan e nem. Eöm se koman nem a ö ne Sosoenën to hehe voh a napan peß, ko me tavus këh maß raoe pa muhin va Isip. Ivëhkëk, po vamurin neß to miröß en po teß varih to hikta vaman ne poë. 6 Paröm koman nem o ankeroß varih to hikta ötöön voh ne a ma tasun kikis pee, ivëhkëk, ee to këh ee pa ma vöön totoopin pee manuh pa vöön va kin. Ivëh, ke Sosoenën heß voh en pa soe vaonöt va pa ö nee se nohnoh raoe po uris teßteß tamoaan, pareß ötöön non raoe pa vöön vëh a kukuit vörep rakah, kee anoeh ne o Poen apuh vëh ne Sosoenën se vateß raoe po vahutët. 7 Paröm koman nem a poa vöön apuh varih a Södom me a Gomoraß, me a ma meh vöön apaßpuh to teß tatavi ne raoe. Ee to nok voh o pöh vu taateß avoeß vamanih po ankeroß poë varih. Ee to vavatet voh ne a ma vu taateß hat, pare nonok ne a ma vu taateß teßteßvaasiß, to paraß in a hat vörep. Ivëh, ke Sosoenën vakmis en pee po suraß teßteß tamoaan. A ma tah poë varih to tanok voh, marën a ö ne ea se koman no, para nat no a vatet a ma taateß hat pa napan poë varih.

8 Eß to vatoe me e non po teß varih to hop voh maß po kum peöm. Ee to vavatet ne a ma moeh vu tatarep to nonok non raoe, kee vövöknoes koman hah a ne pa ma taateß hat pee. Ee to kokoe e ne pa tasun pe Sosoenën, pare sosoe vahat e ne po ankeroß.

9 E susun po ankeroß ro vëh e Maëkel to hikta kiiki voh e susun po oraß hat, pareß soe vahat in poan po poen nee to vasosöë suk ne eteh se kon a sionin e Mosës. Ivëhpëhkëk, eß to soe varoe vamanih pan, “E Sunön se vakmis oah.” 10 Ivëhkëk, a napan poë varih to sosoe vahat e ne pa ma tah, nee hikta maaka ne. Kataeah nee to nat koe ne manih po haharaß, vamanih pa ö no vönaß va muhin to nat va ne a ma moeh tah, a ma tah rakah ko poë varih to tektek non raoe. 11 Varenan rakah pee. Ee to suk voh ee pa hanan hat pe Keen vëh, to ip vamët voh e kea peß. Ee to iu voh ne a moniß, ivëh, kee heß hah voh rea manih pa nok o pöh vu taateß vëh ne Balam to nok voh. Ee to vakihat me voh ne e Sosoenën, keß öök e non kuru vamanih pa ö ne Korah to vakihat me vavoh non poan. Ivëh, kee se tatek rakah va ee manih pa ö neß to tatek vavoh. 12 Ee to teß va e ne manih pa ma ta kusan to teß ne manih pa taëën vapenpen peöm, nöm to pët vavaëën nem. Ee to hikta potpoet ne sih pa ëën vamanih pee to teß ne po vaënëën apuh, pare koman varoe hah a ne.

Ee to teß va e ne manih pa unöh koraß to hikta teß non ta uhön, no a tuvuh to teßteß vah non. Ee to teß va e ne manih pa ma vu naon va pa tëëm anaß to hikta vovoaß ne, no a napan to rëh puit me a ma aan, kee mët vahik ee. 13 Ee to teß va e ne manih pa ma ta supa sukaß va tahiß. Ee to viivi peah koman hah ne maß a ma taateß vapoet pee vamanih po poe. Ee to teß va e ne manih po vesun to nö ke këh voh a ma hanan totoopin pee nee to suksuk ne sih, ivëh ke Sosoenën vamatop voh ken pee pa ö teßteß tamoaan manih pa popoen vëh a kukuit rakah.

14 E Inök a vatönim me paeh pau teß to suk voh maß e Adam. Eß to vanënën soe suk voh e non pa napan poë varih,

“Ep öm e Sunön to nönö non maß,
me a ma ususoan ankeroß vivihan peß,
15 pa kiiki a ma napan kurus.
Eß to nönö non maß pa vakmis a nap nonok hat varih to heß tonun voh e Sosoenën pa ma taateß hat kurus nee to nok voh manih peß.
Pareß vakmis a nap nonok hat varih to heß tonun voh e Sosoenën pa ma tah hat nee to soe voh manih peß.”
16 A ma teß poë varih to teß ne sih pa taateß varek me vapokaß ro upöm teß. Ee to suksuk ne sih a ma iu hat koman pee. Ee to këëkë koman hah a ne, pare teß ne pa vamanman o upöm teß pa kon a ma taneah nee to iu ne.

A Soe Vaënpan Me A Ma Tah Seröm Nok

17 Ma vamomhë peöß, eöm se koman nem a tah no aposol pe Sunön pea Ieesuß Kristo to soe voh. 18 Ee to soe voh ka neöm pan, “Manih pa ma tëëm va amot, eß se teß non a napan se kö e Sosoenën, a napan poë varih se suksuk e ne pa ma iu hat koman pee varih to heß tonun e non pe Sosoenën.” 19 A napan poë varih to nonok ne a ma taateß vaëh kiiki, ka ma kokoman pee teß varoe ne pa ma tah va po oeh vëh, ivëh, ka Tuvuh pe Sosoenën hikta teß non pee.

20 Ivëhkëk, ma vamomhë peöß, eöm se vakiu o vaman vivihan peöm pa vakikis koman hah ëm pa hin manih po kikis pa Tuvuh Vasioß. 21 Paröm teß hop nem manih po iu pe Topoan, pa tëëm nöm to anoeh nem e Sunön pea Ieesuß Kristo. Manih po ururuan peß, eß se heß a neöm o toßtoß tamoaan.

22 Eöm se vataare nem o ururuan manih po teß varih to vavovoeak ne. 23 Paröm heß o upöm teß a soe vaënpan, marën a hehe raoe këh o suraß ësës tamoaan. Eöm se vataare o ururuan vaßpeh me o naöp manih po upöm, ivëhkëk, eöm se rës me nem pa ma ohop pee varih to pö taneß non pa ma taateß hat pee.

Kë A Ëhnan E Topoan

24 E Sosoenën a kikis, ko se vaßaus en peöm köm hikta se kuß nem pa taateß hat. Eß to antoen e non pa me a neöm manih pa havineah, köm hikta se teß nem ta hat. Pareß antoen e non pa heß a neöm o vaeö apuh.

25 Eß a paeh Sosoenën varoe kuru to hehe hah voh a ra. Ivëh, ka se kë no a ëhnaneah, ko heß no eah o ëhnan apuh manih pe Ieesuß Kristo, e Sunön pea. Eß to teß me non o kikis me a tasun apuh va pa vovoh ke ra ma moeh ta kurus, taneo non maß po taneo in o oeh, kuru, me pa ma tamoaan. Oman.